Bagong Taon Nanaman

http://www.pinoyexchange.com

Ilang ikot pa ng tangkay ng orasan
Kalendaryong gamit muling papalitan
Mga paghahanda’y kaliwa’t kanan
Paligid tiyak dadagundong nanaman

Tiyak na paligid nga ay dadagundong
Sa nanalapit nanamang bagon taon
Kasi gawi na kapag ito’y sinalubong
Paputok dapat bahagi ng selebrasyon

Ang paniniwala kasing nakagisnan
Ingay at paputok kinatatakutan
Ng mga espiritung dala’y kamalasan
Kaya’t sa bagong taon ay pa-ingayan

Ngunit wika ni Brod Pete may nasusulat
Ang paputok daw pala dala ay malas
Espiritung nasa labas kapag nagulat
Sa bahay, nang taguan, ay hahagilap

Dagdag niya kung gusto raw makatiyak
Ito’y kanyang binasa sa nasusulat
Nang ‘di papasok itinataboy na malas
Magpaputok sa loob ‘wag lang sa labas

Meron pang uso bukod sa mga paputok
T’wing bagong taon malapit nang pumasok
Ang natura’y prutas na korteng bilog
Ubod nang dami kung sa mesa’y ihandog

Bilog, kasi, ang kasinghugis ay pera
Kaya’t sa bagong taon swerte daw ang dala
Sa bilog na prutas yayaman, giginhawa
Hindi ang bumibili kundi ang tindera

Iba’t-iba ang ating mga pamahiin
T’wing ang bagong taon ay sasalubungin
May pagkaing dapat at di-dapat ihain
May kulay ang damit na dapat suotin

Dapat may lucky charm sa ding-ding nakadikit
Dili kaya’y sa damit ito’y nakakabit
Dapat kulay pula ang isuot na damit
At may mga bilog dito’y nakatitik

Malas di maitataboy ng paputok
Swerte’y di dadalhin ng prutas na bilog
Kung sa pamahiin hindi huhulagpos
Masaganang buhay hindi maaabot

Kung tagumpay ay nais makamtan
Mga pamahiin atin nang talikuran
Sa bagong taon ang ating asahan
Awa ng DIYOS at sariling kagalingan